Ramachalam మెదక్ జిల్లా ఆందోల్ నియోజకవర్గం టేక్మాల్ మండలం వేల్పుగొండ గ్రామంలో వెలసిన దివ్యక్షేత్రం. రామచలం కొండపై శ్రీ సీతారామచంద్ర స్వామి వారి 42వ కళ్యాణ మహోత్సవాలు ఈ నెల 25వ తేదీ నుండి 27వ తేదీ వరకు అత్యంత వైభవంగా జరగనున్నాయి. రుస్తుంపేట శ్రీ ఆత్మానంద ఆశ్రమ పీఠాధిపతులు రాజయోగి వెంకట స్వామి దివ్య ఆశీస్సులతో ఈ ఉత్సవాలను నిర్వహించనున్నారు.
గత కొన్ని దశాబ్దాలుగా భక్తుల కోర్కెలు తీరుస్తూ, కొంగుబంగారమై విరాజిల్లుతున్న రామచలం క్షేత్రంలో మూడు రోజుల పాటు ఉత్సవాలను నిర్వహించనున్నారు.
Ramachalam ఉత్సవాలు
- మార్చి 25 (బుధవారం – చైత్ర శుద్ధ సప్తమి): ఉదయం గణపతి పూజ, గోపూజ, గురు పూజతో ఉత్సవాలు ప్రారంభమవుతాయి. అనంతరం స్వస్తి వచనం, అఖండ దీపారాధన, అగ్ని ప్రతిష్ఠాపన, హారతి మరియు తీర్థ ప్రసాద వితరణ ఉంటుంది.
- మార్చి 26 (గురువారం – చైత్ర శుద్ధ అష్టమి): ఉదయం విశేష పూజలు, గోపూజ నిర్వహిస్తారు. అనంతరం శ్రీ రామ మూల మంత్ర హవనము, మన్యు సూక్త యాగము మరియు హారతి కార్యక్రమాలు జరుగుతాయి.
- మార్చి 27 (శుక్రవారం): ఉత్సవాల్లో అత్యంత కీలకమైన రోజు. ఉదయం బలిప్రదానం, గురుపూజ, గోపూజ నిర్వహించి స్వామివారికి అభిషేకం చేస్తారు. అనంతరం పూర్ణాహుతి ఉంటుంది.
- బోనాల ఊరేగింపు: ఉదయం గ్రామంలోని పురవీధుల గుండా భక్తుల బోనాల ఊరేగింపు ఉంటుంది.
- సీతారాముల కళ్యాణం: మధ్యాహ్నం సీతారాముల కళ్యాణ మహోత్సవాన్ని అంగరంగ వైభవంగా నిర్వహిస్తారు. అనంతరం వివిధ సాంస్కృతిక కార్యక్రమాలు అలరించనున్నాయి.
- పల్లకి సేవ: రాత్రి వేళ స్వామివారి పల్లకి సేవ ఊరేగింపు భక్తులకు నయనానందకరంగా సాగనుంది.
నిత్య అన్నదానం:
ఉత్సవాలు జరిగే మూడు రోజుల పాటు భక్తుల సౌకర్యార్థం నిత్య అన్నదాన కార్యక్రమం ఏర్పాటు చేసినట్లు ఆలయ కమిటీ సభ్యులు తెలిపారు. ఈ దివ్య వేడుకల్లో భక్తులు అధిక సంఖ్యలో పాల్గొని స్వామివారి కృపకు పాత్రులు కావాలని, కార్యక్రమాలను విజయవంతం చేయాలని కమిటీ సభ్యులు కోరారు.