New Income Tax Act 2025 : దేశ పన్నుల చరిత్రలో నేటి నుండి ఒక కొత్త అధ్యాయం మొదలైంది. సుమారు ఆరు దశాబ్దాల కాలం నాటి పాత ‘ఆదాయపు పన్ను చట్టం-1961’ స్థానంలో కేంద్ర ప్రభుత్వం ప్రతిష్టాత్మకంగా తీసుకొచ్చిన ‘ఆదాయపు పన్ను చట్టం-2025’ బుధవారం (ఏప్రిల్ 1, 2026) నుండి అమల్లోకి వచ్చింది. కొత్త ఆర్థిక సంవత్సరం (2026-27) ప్రారంభమైన నేపథ్యంలో, పన్ను నిబంధనల్లో ప్రభుత్వం కీలక సవరణలు చేసింది.
New Income Tax Act 2025 కొత్త చట్టంలో ప్రధాన మార్పులు
1. సులభతరమైన పన్ను విధానం: పన్ను విధానాన్ని సామాన్యులకు సైతం అర్థమయ్యేలా సరళతరం చేయడం ఈ చట్టం ముఖ్య ఉద్దేశ్యం. ఇందులో భాగంగా పాత చట్టంలోని ‘అసెస్మెంట్ ఇయర్’, ‘ప్రీవియస్ ఇయర్’ అనే గందరగోళాన్ని తొలగించి, రెండింటినీ కలిపి ఒకే ‘ట్యాక్స్ ఇయర్’ విధానాన్ని ప్రవేశపెట్టారు.
2. టీడీఎస్ (TDS) రిఫండ్పై వెసులుబాటు: గడువు ముగిసిన తర్వాత ఆదాయపు పన్ను రిటర్నులు (ITR) దాఖలు చేసినా, ఇప్పుడు ఎలాంటి జరిమానా లేకుండానే టీడీఎస్ రిఫండ్ను క్లెయిమ్ చేసుకునే అవకాశాన్ని కల్పించారు.
3. విదేశీ ప్రయాణాలు & విద్యపై ఊరట (TCS తగ్గింపు): మధ్యతరగతి ప్రజలకు ఊరటనిస్తూ, విదేశీ టూర్ ప్యాకేజీలపై మూలం వద్ద పన్ను వసూలు (TCS)ను 20% నుండి 2 శాతానికి భారీగా తగ్గించారు. అలాగే విదేశాల్లో వైద్యం మరియు విద్యా అవసరాల కోసం పంపే నిధులపై కూడా టీసీఎస్ను 5% నుండి 2 శాతానికి తగ్గించడం విశేషం.
4. ఎఫ్ అండ్ ఓ (F&O) ట్రేడింగ్పై పన్ను పెంపు: ఈక్విటీ డెరివేటివ్స్ విభాగంలో చిన్న మదుపర్లు నష్టపోకుండా ఉండేందుకు సెక్యూరిటీస్ ట్రాన్సాక్షన్ ట్యాక్స్ (STT)ను పెంచారు:
- ఫ్యూచర్స్ కాంట్రాక్టులపై: 0.02% నుండి 0.05 శాతానికి.
- ఆప్షన్స్ ప్రీమియంపై: 0.1% నుండి 0.15 శాతానికి.
5. బైబ్యాక్ షేర్లపై సర్ఛార్జీ: కంపెనీలు షేర్లను బైబ్యాక్ చేసినప్పుడు వాటాదారులకు వచ్చే లాభాలపై 12% సర్ఛార్జీ విధించనున్నారు. గతంలో రూ. 50 లక్షల వరకు ఈ సర్ఛార్జీ ఉండేది కాదు.
New Income Tax Act 2025 ఐటీఆర్ (ITR) ఫారాల జారీ
ఆదాయపు పన్ను విభాగం 2026-27 మదింపు సంవత్సరానికి సంబంధించి మొత్తం 7 రకాల ఐటీఆర్ ఫారాలను నోటిఫై చేసింది.
- ఐటీఆర్-1 (సహజ్): రూ. 50 లక్షల లోపు వార్షికాదాయం ఉండి, వేతనం పొందే వారికి.
- ఐటీఆర్-4 (సుగమ్): చిన్న వ్యాపారస్తులు మరియు వృత్తి నిపుణుల కోసం.
- ఆడిట్ అవసరం లేని వారు తమ రిటర్నులను జులై 31 లోపు దాఖలు చేయాల్సి ఉంటుంది.
ముఖ్య గమనిక: 2025-26 ఆర్థిక సంవత్సరానికి సంబంధించి జులైలో దాఖలు చేసే రిటర్నులు పాత ఫారాల ప్రకారమే ఉంటాయి. కానీ, నేటి నుండి (జూన్ నుండి చెల్లించే ముందస్తు పన్నుతో సహా) జరిగే లావాదేవీలన్నీ కొత్త చట్టం పరిధిలోకి వస్తాయి.