Techie Suicide Bangalore బెంగళూరులో తెలంగాణకు చెందిన ఇద్దరు యువ టెకీల ఆత్మహత్య కలకలం రేపింది. అనారోగ్య కారణాలతో ప్రియుడు ఉరివేసుకోగా, ఆ దృశ్యాన్ని చూసి తట్టుకోలేక ప్రియురాలు అపార్ట్మెంట్ 17వ అంతస్తు నుండి దూకి ప్రాణాలు వదిలింది.
Techie Suicide Bangalore ఘటన వివరాలు
సిద్దిపేట జిల్లా ములుగు మండలం అన్నాసాగర్ గ్రామానికి చెందిన రఘుపతిరెడ్డి, జయమ్మ దంపతుల పెద్ద కుమారుడు భానుచందర్ రెడ్డి (32). ఇతను 13 ఏళ్ల క్రితం కెనడా వెళ్లి, రెండేళ్ల క్రితం తిరిగి వచ్చి బెంగళూరులో స్థిరపడ్డాడు. భానుచందర్ రెడ్డి గత కొంతకాలంగా మేడ్చల్ జిల్లాకు చెందిన బీబీ షాజియా సిరాజ్ (31) అనే యువతిని ప్రేమించి, ఆమెతో కలిసి ధణసింద్ర మెయిన్ రోడ్డులోని నికో హోమ్స్ అపార్ట్మెంట్లో సహజీవనం చేస్తున్నాడు.
విషాదానికి దారితీసిన పరిస్థితులు
గత కొంతకాలంగా భానుచందర్ రెడ్డి అనారోగ్య సమస్యలతో బాధపడుతున్నట్లు తెలుస్తోంది. ఈ క్రమంలోనే ఆయన ఉరివేసుకుని ఆత్మహత్య చేసుకున్నాడు. తాజాగా స్వగ్రామానికి వెళ్లి తిరిగి వచ్చిన షాజియా.. గదిలో భానుచందర్ విగతజీవిగా వేలాడటం చూసి తీవ్ర దిగ్భ్రాంతికి లోనైంది. ఆ బాధను తట్టుకోలేక ఆమె వెంటనే అదే అపార్ట్మెంట్ 17వ అంతస్తు పైనుండి కిందకు దూకి ఆత్మహత్య చేసుకుంది.
పోలీసుల దర్యాప్తు
స్థానికుల సమాచారం మేరకు ఘటనా స్థలానికి చేరుకున్న పోలీసులు వివరాలు సేకరించారు. తమ కుమారుడు అసలు ఇండియాకు వచ్చాడనే విషయమే తమకు తెలియదని భానుచందర్ తల్లిదండ్రులు కన్నీరుమున్నీరయ్యారు. షాజియా మరణంపై ఆమె కుటుంబ సభ్యులు వివరాలు తెలిపేందుకు నిరాకరించారు.
ఘటనా స్థలంలో ఎలాంటి సూసైడ్ నోట్ లభించకపోవడంతో, పోలీసులు దీనిని అనుమానాస్పద మరణాలుగా కేసు నమోదు చేశారు. అనారోగ్య సమస్యలే ఆత్మహత్యకు కారణమా? లేక మరేదైనా కారణం ఉందా? అనే కోణంలో దర్యాప్తు చేస్తున్నారు.