అల్లాదుర్గం: మండల పరిధిలోని గడిపెద్దాపూర్ గ్రామంలో నూతన పింఛన్ల కోసం అందిన దరఖాస్తుల క్షేత్రస్థాయి పరిశీలన గురువారం ముమ్మరంగా సాగింది. జిల్లా పంచాయతీ అధికారి (డీపీఓ) యాదయ్య స్వయంగా గ్రామంలో పర్యటించి దరఖాస్తుదారుల వివరాలను పరిశీలించారు.
ప్రభుత్వ నిబంధనల ప్రకారం అర్హులైన నిజమైన లబ్ధిదారులను గుర్తించి పారదర్శకమైన జాబితాను రూపొందించేందుకు అధికారులు ఈ విచారణ చేపట్టారు. ఈ సందర్భంగా డీపీఓ యాదయ్య దరఖాస్తుదారుల ఇళ్లకు వెళ్లి వివరాలు, ధ్రువపత్రాలను స్వయంగా తనిఖీ చేశారు. అర్హులైన ప్రతి ఒక్కరికీ సంక్షేమ పథకాలు అందాలన్నదే ప్రభుత్వ లక్ష్యమని, ఎలాంటి అక్రమాలకు తావులేకుండా నిష్పాక్షికంగా అర్హుల జాబితాను సిద్ధం చేస్తామని ఆయన స్పష్టం చేశారు.
ఈ పరిశీలన కార్యక్రమంలో గ్రామ సర్పంచ్ హరికృష్ణ, పంచాయతీ కార్యదర్శి జనార్ధన్‌లతో పాటు గ్రామ పంచాయతీ సిబ్బంది, స్థానికులు పాల్గొన్నారు.
