భారత్ వేదికగా జింబాబ్వేతో జరుగుతున్న మూడు టీ20ల ద్వైపాక్షిక సిరీస్‌లో భారత మహిళల జట్టు విజయంతో శుభారంభం చేసింది. రాయ్‌పూర్‌లోని షహీద్ వీర్ నారాయణ్ సింగ్ ఇంటర్నేషనల్ స్టేడియంలో శుక్రవారం రాత్రి జరిగిన ఉత్కంఠభరిత తొలి టీ20 పోరులో భారత జట్టు 4 వికెట్ల తేడాతో విజయం సాధించింది. ఒక దశలో కేవలం 19 పరుగులకే 4 కీలక వికెట్లు కోల్పోయి ఘోర పరాజయం దిశగా సాగిన టీమిండియాను అరంగేట్ర ప్లేయర్ నికి ప్రసాద్, సీనియర్ ఆల్‌రౌండర్ దీప్తి శర్మ అద్భుత భాగస్వామ్యంతో గెలిపించారు. ఈ విజయంతో భారత్ సిరీస్‌లో 1-0 ఆధిక్యంలో నిలిచింది.
తొలుత తడబడిన జింబాబ్వే
ఈ మ్యాచ్‌లో టాస్ ఓడి తొలుత బ్యాటింగ్‌కు దిగిన జింబాబ్వే నిర్ణీత 20 ఓవర్లలో 5 వికెట్ల నష్టానికి 114 పరుగులు చేసింది. భారత బౌలర్ క్రాంతి గౌడ్ ఇన్నింగ్స్ మొదటి ఓవర్‌లోనే జింబాబ్వే ఓపెనర్ బిలోవ్డ్ బిజా (0)ను ఎల్బీడబ్ల్యూగా పెవిలియన్‌కు పంపి గట్టి షాక్ ఇచ్చింది. అయితే, మరో ఓపెనర్ కెలిస్ ఎండ్‌లోవు (44 బంతుల్లో 42 పరుగులు; 6 ఫోర్లు), షార్నే మేయర్స్ (33 బంతుల్లో 43 నాటౌట్) బాధ్యతాయుతంగా ఆడి ఇన్నింగ్స్‌ను చక్కదిద్దారు. భారత బౌలర్లలో నందిని శర్మ 2 వికెట్లు తీయగా, క్రాంతి గౌడ్ ఒక వికెట్ దక్కించుకుంది.
టాప్ ఆర్డర్ కుప్పకూలినా.. నికి, దీప్తి వీరోచిత పోరాటం
115 పరుగుల స్వల్ప లక్ష్యంతో బరిలోకి దిగిన భారత్‌కు జింబాబ్వే ఆఫ్‌స్పిన్నర్ న్యాషా గ్వాంజురా ఊహించని షాక్ ఇచ్చింది. పవర్‌ప్లేలోనే భారత్‌ను గట్టి దెబ్బ కొట్టింది. కెప్టెన్ స్మృతి మంధాన (9) రెండో ఓవర్ తొలి బంతికే ఔట్ కాగా, అనంతరం షెఫాలీ వర్మ (4), అనుష్క శర్మ (4), హర్మన్‌ప్రీత్ కౌర్ (1) వరుసగా పెవిలియన్ చేరారు. దీంతో భారత్ కేవలం 19 పరుగులకే 4 ప్రధాన వికెట్లు కోల్పోయి తీవ్ర సంక్షోభంలో పడింది.
ఆ క్లిష్ట సమయంలో అండర్-19 ప్రపంచకప్ మాజీ స్టార్, అరంగేట్ర ప్లేయర్ నికి ప్రసాద్ (35 బంతుల్లో 39 నాటౌట్), స్టార్ ఆల్‌రౌండర్ దీప్తి శర్మ (37 బంతుల్లో 49; 8 ఫోర్లు) కలిసి మ్యాచ్‌ను మలుపు తిప్పారు. వీరిద్దరూ 5వ వికెట్‌కు 82 పరుగుల అమూల్యమైన భాగస్వామ్యాన్ని నెలకొల్పి మ్యాచ్‌ను భారత్ వైపు తిప్పారు. హాఫ్ సెంచరీకి ఒక్క పరుగు దూరంలో దీప్తి శర్మ, ఆ తర్వాత రిచా ఘోష్ ఔటైనా.. క్రీజులో పాతుకుపోయిన నికి ప్రసాద్ బౌండరీతో మ్యాచ్‌ను ముగించింది. భారత్ 15.4 ఓవర్లలోనే 116/6 పరుగులు చేసి విజయభేరి మోగించింది. మ్యాచ్ విన్నింగ్ ఇన్నింగ్స్ ఆడిన దీప్తి శర్మకు ‘ప్లేయర్ ఆఫ్ ది మ్యాచ్’ అవార్డు దక్కింది.
