బెల్లంపల్లి, అక్టోబర్ 8: బెల్లంపల్లి మున్సిపాలిటీ 13వ వార్డు పరిధిలోని కాల్‌టెక్స్‌ నుంచి అశోక్‌నగర్‌ వెళ్లే మార్గంలోని అండర్‌ బ్రిడ్జి వద్ద రహదారి అధ్వానంగా మారడంతో గత కొన్నిరోజులుగా వాహనదారులు తీవ్ర ఇబ్బందులు ఎదుర్కొంటున్నారు. ఈ సమస్యను పలువురు స్థానికులు వార్డు కౌన్సిలర్ దొంగల రాజ్‌కుమార్‌ యాదవ్‌ (చింటు) దృష్టికి తీసుకెళ్లారు.
స్థానికుల సమస్యపై వెంటనే స్పందించిన కౌన్సిలర్ దొంగల రాజ్‌కుమార్‌ యాదవ్‌ మున్సిపల్ జేసీబీ సహాయంతో రహదారిని చదును చేయించారు.
అంతేకాకుండా వర్షపు నీరు రహదారిపై నిల్వ ఉండకుండా సులభంగా వెళ్లిపోయేలా పైపును ఏర్పాటు చేయించారు. దీంతో వాహనదారులకు, స్థానికులకు ఇబ్బందులు తొలగడంతో వారు కౌన్సిలర్‌కు కృతజ్ఞతలు తెలిపారు. ఈ కార్యక్రమంలో బీఆర్ఎస్ పార్టీ నాయకులు హనీఫ్‌, మురుకూరి శ్రావణ్‌, చింతల శ్రీనివాస్‌, ఉమామహేశ్వర్‌, పాషా, బంక కుమార్‌, ఈగ నర్సయ్య తదితరులు పాల్గొన్నారు.
