నేటి ఉరుకుల పరుగుల ఆధునిక జీవనశైలిలో మహిళల పరిస్థితి కత్తిమీద సాములా మారింది. ఉద్యోగ బాధ్యతలు, ఇంటి పనులు, కుటుంబ సంరక్షణ అంటూ నిత్యం తీవ్రమైన మానసిక, శారీరక ఒత్తిడికి గురవుతున్నారు. అయితే ఎంత బిజీగా గడిపినా ఆరోగ్యాన్ని ఏమాత్రం నిర్లక్ష్యం చేయకూడదని ప్రముఖ పోషకాహార నిపుణురాలు రాశి చౌదరి స్పష్టం చేస్తున్నారు. ముఖ్యంగా చాలామంది మహిళలు నిరంతరం అలసటగా అనిపిస్తున్నా దానిని సాధారణ విషయంగా భావించి దాటవేస్తుంటారు. రోజుకు కేవలం నాలుగు గంటలు మాత్రమే నిద్రపోయి ఒక వ్యాపార సంస్థను నడిపించవచ్చేమో గానీ, శరీర ఆరోగ్యాన్ని మాత్రం అలా ఎక్కువ కాలం కాపాడుకోలేమని ఆమె హెచ్చరిస్తున్నారు.
చాలా సందర్భాల్లో సాధారణ రక్త పరీక్షల నివేదికలు నార్మల్‌గా వచ్చినప్పటికీ నిద్రలేమి, తీవ్ర అలసట, మానసిక ఆందోళన వంటి సమస్యలు కొనసాగుతుంటాయి. అలాంటప్పుడు శరీరంలో జరిగే అంతర్గత మార్పులను, హార్మోన్ల అసమతుల్యతను కచ్చితంగా గుర్తించేందుకు మహిళలు కొన్ని నిర్దిష్టమైన అధునాతన పరీక్షలు చేయించుకోవాలని రాశి చౌదరి సూచిస్తున్నారు. అవేంటో వివరంగా తెలుసుకుందాం.
1. డీహెచ్‌ఈఏఎస్ (DHEAS) పరీక్ష
రాత్రి తగినంత సమయం నిద్రపోయినప్పటికీ ఉదయం లేవగానే నీరసం తగ్గకపోవడం, రోజంతా విపరీతమైన అలసట వేధిస్తుంటే వైద్యుల సలహాతో ఈ డీహెచ్‌ఈఏఎస్ పరీక్ష చేయించుకోవాలి. మన శరీరంలో ఎడ్రినల్ గ్రంథుల పనితీరును ఇది ప్రతిబింబిస్తుంది. 35 ఏళ్ల వయస్సు దాటిన తర్వాత ఈ హార్మోన్ స్థాయిలు ప్రతి సంవత్సరం సగటున 2 శాతం మేర తగ్గుముఖం పడతాయని నిపుణులు వివరిస్తున్నారు.
2. ప్రొజెస్టెరాన్ (Progesterone) పరీక్ష
తెల్లవారుజామునే పదేపదే మెలకువ రావడం, గాఢ నిద్ర పట్టకపోవడం, నెలసరి సమయానికి ముందు తీపి లేదా ఇతర ఆహార పదార్థాలు అతిగా తినాలనే తీవ్ర కోరికలు కలగడం, మానసిక చికాకు (పీఎంఎస్) వంటి లక్షణాలు ఉన్నప్పుడు ప్రొజెస్టెరాన్ స్థాయిలను పరీక్షించుకోవాలి. అయితే ఈ పరీక్షను సాధారణ రోజుల్లో కాకుండా, మహిళల్లో అండోత్సర్గం (Ovulation) జరిగిన ఏడు రోజుల తర్వాత చేయించుకుంటేనే కచ్చితమైన ఫలితాలు తెలుస్తాయి.
3. కార్టిసాల్ (Cortisol) పరీక్ష
పగలంతా తీవ్రమైన నీరసం, అలసటతో ఇబ్బంది పడి, తీరా రాత్రి కాగానే నిద్ర రాకుండా శరీరం ఉత్సాహంగా, యాక్టివ్‌గా అనిపిస్తోందా? అయితే శరీరంలో ఒత్తిడిని నియంత్రించే ‘కార్టిసాల్’ హార్మోన్ లయ తప్పిందని అర్థం. కార్టిసాల్ తీరును తెలుసుకోవడానికి ఉదయం ఒకేసారి రక్త పరీక్ష చేయించుకోవడం కంటే, రోజంతా శరీరంలో హార్మోన్ ఎలా మారుతుందో గమనించేందుకు లాలాజల నమూనా (Saliva test) ద్వారా నాలుగు వేర్వేరు సమయాల్లో పరీక్షించడం మరింత ఉపయోగకరంగా ఉంటుంది.
4. సమగ్ర థైరాయిడ్ ప్రొఫైల్ (Thyroid Panel)
చాలామంది థైరాయిడ్ సమస్య ఉన్నప్పుడు కేవలం టీఎస్‌హెచ్ (TSH) పరీక్ష మాత్రమే చేయించుకుంటారు. కానీ దీనితో థైరాయిడ్ పూర్తి పనితీరు తెలియదు. అవసరాన్ని బట్టి ఫ్రీ టీ3 (Free T3), ఫ్రీ టీ4 (Free T4) స్థాయిలతో పాటు థైరాయిడ్ యాంటీబాడీలను కూడా తప్పనిసరిగా పరీక్షించాలి. ఎందుకంటే హైపోథైరాయిడిజంతో బాధపడే కొందరు మహిళల్లో ‘హషిమోటోస్’ అనే ఆటో ఇమ్యూన్ వ్యాధి ఉన్నప్పటికీ, సరైన యాంటీబాడీ పరీక్షలు చేయకపోవడం వల్ల అది బయటపడకుండా ఉండిపోయే ప్రమాదం ఉంది.
5. ఉపవాస సమయంలో ఇన్సులిన్ (Fasting Insulin) పరీక్ష
ఆకలిని నియంత్రించుకోలేకపోవడం, తరచూ ఏదో ఒకటి తినాలనిపించడం వంటి లక్షణాలు ఉన్నప్పుడు ఫాస్టింగ్ ఇన్సులిన్ పరీక్ష పరిశీలించాలి. సాధారణంగా ఖాళీ కడుపుతో చేసే ఇన్సులిన్ స్థాయి 5 కంటే తక్కువగా ఉండటం ఉత్తమం. అలాగే గత మూడు నెలల సగటు చక్కెర స్థాయిలను అంచనా వేసే హెచ్‌బీఏ1సీ (HbA1c) పరీక్షను కూడా పరిశీలించాలి. దీని విలువ 5.3 కంటే తక్కువగా ఉండేలా చూసుకోవడం మంచిది.
గమనిక : ఈ పరీక్షల ప్రమాణాలు, సంఖ్యలు వ్యక్తుల వయస్సు, ఆరోగ్య చరిత్ర, వారిలో కనిపించే లక్షణాలను బట్టి మారుతుంటాయి. కాబట్టి శరీరంలో నిరంతర అలసట లేదా ఇతర మార్పులు ఉన్నప్పుడు సొంత వైద్యం చేసుకోకుండా, వెంటనే నిపుణులైన వైద్యులను సంప్రదించి సరైన మార్గదర్శకత్వంలో ఈ పరీక్షలు చేయించుకోవడం మేలని నిపుణులు స్పష్టం చేస్తున్నారు.
