- మంబోజిపల్లి ఆలయానికి పోటెత్తిన భక్తులు
- ఘనంగా వేద మంత్రోచ్ఛారణల మధ్య అభిషేకాలు, అన్నదానం
మెదక్, సెప్టెంబర్ 26: మెదక్ మండల పరిధిలోని మంబోజిపల్లి శ్రీ మల్లికార్జున స్వామి ఆలయంలో పౌర్ణమి పర్వదినాన్ని పురస్కరించుకుని శనివారం విశేష ఆధ్యాత్మిక సందడి నెలకొంది. పౌర్ణమి సందర్భంగా ప్రధాన పూజారి మల్లన్న ఆధ్వర్యంలో ఉదయం నుంచే స్వామివారికి శాస్త్రోక్తంగా ప్రత్యేక పూజలు, అభిషేకాలు, మహాన్యాసపూర్వక హోమ కార్యక్రమాలు నిర్వహించారు. వేద పండితుల మంత్రోచ్ఛారణలతో ఆలయ ప్రాంగణం మార్మోగింది.
ఈ సందర్భంగా మెదక్ పట్టణంతో పాటు చుట్టుపక్కల గ్రామాల నుంచి భక్తులు భారీ సంఖ్యలో తరలివచ్చారు. బారులుతీరి స్వామివారిని దర్శించుకుని, కొబ్బరికాయలు కొట్టి ప్రత్యేక మొక్కులు చెల్లించుకున్నారు. భక్తుల రాకతో ఆలయ పరిసరాలు కిటకిటలాడాయి. పూజా కార్యక్రమాల అనంతరం భక్తులకు తీర్థప్రసాదాలు అందజేసి, ఆలయ ప్రాంగణంలో ఘనంగా అన్నదాన కార్యక్రమం నిర్వహించారు.
