ఫ్యూచర్ సిటీ/రంగారెడ్డి :
గణేష్ నవరాత్రుల ముగింపు సందర్భంగా నిర్వహించే వినాయక విగ్రహాల తుది నిమజ్జనం దృష్ట్యా ఫ్యూచర్ సిటీ పోలీస్ కమిషనరేట్ పరిధిలో మద్యం దుకాణాలను తాత్కాలికంగా మూసివేయాలని అధికారులు ఆదేశించారు. శాంతిభద్రతల పరిరక్షణ, ప్రజల భద్రతను దృష్టిలో ఉంచుకుని ఈ నిర్ణయం తీసుకున్నట్లు పోలీసులు వెల్లడించారు.
తెలంగాణ రాష్ట్ర ఎక్సైజ్ చట్టం, 1968 లోని సెక్షన్ 20 ప్రకారం తమకు గల అధికారాలను వినియోగిస్తూ ఫ్యూచర్ సిటీ పోలీస్ కమిషనర్ డా. తరుణ్ జోషి, ఐపీఎస్ బుధవారం ఈ మేరకు అధికారిక నోటిఫికేషన్ విడుదల చేశారు.
అమలు సమయం & వివరాలు:
మూసివేత సమయం: సెప్టెంబర్ 25, 2026 ఉదయం 6:00 గంటల నుండి సెప్టెంబర్ 26, 2026 ఉదయం 6:00 గంటల వరకు (మొత్తం 24 గంటల పాటు).
వర్తించేవి: ఫ్యూచర్ సిటీ పోలీస్ కమిషనరేట్ పరిధిలోని అన్ని వైన్ షాపులు, కల్లు దుకాణాలు మరియు రెస్టారెంట్లకు అనుబంధంగా ఉండే సాధారణ బార్లకు ఈ ఆదేశాలు వర్తిస్తాయి.
మినహాయింపులు: స్టార్ హోటళ్లలోని బార్లు మరియు రిజిస్టర్డ్ క్లబ్బులకు మాత్రమే ఈ మూసివేత ఉత్తర్వుల నుంచి మినహాయింపునిచ్చారు.
నిర్దేశిత సమయంలో నిబంధనలను కచ్చితంగా పాటించాలని, నిబంధనలు ఉల్లంఘిస్తే చట్టపరమైన కఠిన చర్యలు తీసుకుంటామని సీపీ హెచ్చరించారు. నిమజ్జన వేడుకలు ప్రశాంత వాతావరణంలో జరిగేందుకు వ్యాపారులు, ప్రజలు పోలీసులకు సహకరించాలని కోరారు.
