తాండూర్: మంచిర్యాల జిల్లా తాండూర్ మండలంలోని అన్ని గ్రామాల్లో బతుకమ్మ పండుగను పురస్కరించుకుని ప్రత్యేక ఏర్పాట్లు చేపట్టాలని సీపీఐ తాండూర్ మండల కార్యదర్శి కొండు బానేష్ అధికారులను కోరారు. ప్రతి గ్రామంలో విద్యుత్ దీపాల వ్యవస్థను పరిశీలించి, పనిచేయని వీధి దీపాలకు వెంటనే మరమ్మతులు చేపట్టాలని సూచించారు. అవసరమైన ప్రాంతాల్లో కొత్త వీధి దీపాలను ఏర్పాటు చేసి విద్యుత్ స్తంభాలకు అమర్చాలని కోరారు. బతుకమ్మ పండుగ సందర్భంగా రాత్రి వేళల్లో గ్రామ ప్రజలకు మెరుగైన వెలుతురు అందేలా అధికారులు చర్యలు తీసుకోవాలన్నారు.
అలాగే గ్రామాల్లో పారిశుద్ధ్యంపై ప్రత్యేక దృష్టి సారించి, వీధులు పరిశుభ్రంగా ఉండేలా చర్యలు చేపట్టాలని కోరారు. ప్రజలకు ఎలాంటి ఇబ్బందులు కలగకుండా తాగునీరు, పారిశుద్ధ్యం, వీధి దీపాలు తదితర మౌలిక సదుపాయాలను మెరుగుపరచాలని అన్నారు. ప్రతి గ్రామంలో ప్రజలందరూ బతుకమ్మ పండుగను సంతోషంగా, ప్రశాంతంగా, సురక్షితంగా జరుపుకునేలా అధికారులు ముందస్తు ఏర్పాట్లు పూర్తి చేయాలని కొండు బానేష్ విజ్ఞప్తి చేశారు.
