రంగారెడ్డి ప్రతినిధి : ఎస్ఐఆర్ (SIR) ప్రక్రియను తక్షణమే రద్దు చేయాలని, కేంద్ర ఎన్నికల సంఘం ప్రధాన కమిషనర్ జ్ఞానేష్ కుమార్‌ను బర్తరఫ్ చేయాలని డిమాండ్ చేస్తూ ఏఐఎస్ఎఫ్ (AISF), ఏఐవైఎఫ్ (AIYF) తెలంగాణ రాష్ట్ర కమిటీల పిలుపు మేరకు బుధవారం తెలంగాణ రాష్ట్ర ఎన్నికల సంఘం కార్యాలయం వద్ద భారీ ఎత్తున ధర్నా నిర్వహించారు. ఈ నిరసన కార్యక్రమంలో విద్యార్థి, యువజన సంఘాల ప్రతినిధులు పెద్ద సంఖ్యలో పాల్గొని కేంద్ర ప్రభుత్వానికి, ఎన్నికల సంఘం వైఖరికి వ్యతిరేకంగా నినాదాలు చేశారు.
ప్రజాస్వామ్య విలువలను కాపాడటమే లక్ష్యం
ఈ ఆందోళన కార్యక్రమంలో ఏఐఎస్ఎఫ్ రంగారెడ్డి జిల్లా అధ్యక్షుడు ఎం. పవన్ చౌహాన్, కార్యదర్శి వంశీవర్ధన్ రెడ్డి పాల్గొని మాట్లాడారు. ప్రజాస్వామ్య వ్యవస్థలో అత్యంత కీలకమైన ఓటు హక్కులను హరించేలా ఎస్ఐఆర్ ప్రక్రియ సాగుతోందని వారు తీవ్ర ఆగ్రహం వ్యక్తం చేశారు. కేంద్ర ఎన్నికల ప్రధాన కమిషనర్ జ్ఞానేష్ కుమార్ తన పదవికి రాజీనామా చేసేవరకు, వివాదాస్పద ఎస్ఐఆర్ ప్రక్రియను పూర్తిగా రద్దు చేసేంత వరకు తెలంగాణ రాష్ట్రవ్యాప్తంగా విద్యార్థులు, యువజనుల ఉద్యమం ఆగదని స్పష్టం చేశారు. స్వతంత్రంగా వ్యవహరించాల్సిన రాజ్యాంగబద్ధ సంస్థలు అధికార పక్షానికి అనుకూలంగా వ్యవహరించడం ప్రజాస్వామ్యానికి తీవ్ర ముప్పని వారు ఆందోళన వ్యక్తం చేశారు.
పోలీసుల మోహరింపు
ఎన్నికల సంఘం కార్యాలయాన్ని ముట్టడించేందుకు నాయకులు, కార్యకర్తలు ప్రయత్నించడంతో అక్కడ స్వల్ప ఉద్రిక్త వాతావరణం నెలకొంది. పోలీసులు బారికేడ్లు ఏర్పాటు చేసి ఆందోళనకారులను అడ్డుకున్నారు. అనంతరం నిరసన తెలుపుతున్న ఏఐఎస్ఎఫ్, ఏఐవైఎఫ్ రంగారెడ్డి జిల్లా అధ్యక్షుడు పవన్ చౌహాన్, వంశీవర్ధన్ రెడ్డిలతో పాటు పలువురు ముఖ్య నాయకులను బలవంతంగా అదుపులోకి తీసుకుని పోలీసు వాహనాల్లో సమీప పోలీస్ స్టేషన్‌కు తరలించారు.
ఉద్యమాన్ని ఉధృతం చేస్తాం
అరెస్టుల సందర్భంగా నాయకులు మాట్లాడుతూ.. పోలీసుల నిర్బంధాలు, అరెస్టులతో ప్రజా ఉద్యమాలను ఆపలేరని హెచ్చరించారు. విద్యార్థులు, యువత భవిష్యత్తు కోసం, పారదర్శకమైన ఎన్నికల వ్యవస్థ కోసం రాబోయే రోజుల్లో అన్ని విశ్వవిద్యాలయాలు, కళాశాలల స్థాయిలో ఈ ఉద్యమాన్ని మరింత ఉధృతం చేస్తామని నాయకులు స్పష్టం చేశారు. ఈ ఆందోళన కార్యక్రమంలో రంగారెడ్డి జిల్లా నాయకులు ఆకాష్ నాయక్, శివకుమార్, భాను ప్రకాష్‌లతో పాటు పలువురు విద్యార్థి, యువజన సంఘాల కార్యకర్తలు పెద్ద సంఖ్యలో పాల్గొన్నారు.
