ఆందోల్ ప్రతినిధి : టీబీ ముక్త్ అభియాన్ కార్యక్రమంలో భాగంగా జిల్లాలో మెరుగైన పనితీరు కనబరిచిన గ్రామపంచాయతీలకు జిల్లా కలెక్టర్ కార్యాలయంలో ప్రశంసా పత్రాలు, ధ్రువీకరణ సర్టిఫికెట్లు అందజేశారు. ఈ కార్యక్రమంలో భాగంగా ఆందోల్ మండలం చింతకుంట గ్రామపంచాయతీకి సిల్వర్ మెడల్, పోతిరెడ్డిపల్లి గ్రామపంచాయతీకి బ్రాంజ్ మెడల్ లభించాయి.
ఈ సందర్భంగా చింతకుంట గ్రామ సర్పంచ్ నాగరాజు, పోతిరెడ్డిపల్లి గ్రామ సర్పంచ్ విజయలక్ష్మిలు జిల్లా కలెక్టర్ కార్యాలయంలో అడిషనల్ కలెక్టర్ పాండు నాయక్ చేతుల మీదుగా గుర్తింపు పత్రాలు అందుకున్నారు.
ఈ కార్యక్రమంలో అధికారులు జానకి రెడ్డి, రాజేష్ తోపాటు పలువురు అధికారులు పాల్గొన్నారు. టీబీ నిర్మూలన కార్యక్రమంలో గ్రామస్థాయిలో చింతకుంట, పోతిరెడ్డిపల్లి గ్రామపంచాయతీలు చూపిన చొరవకు ఈ గుర్తింపు లభించడం పట్ల స్థానిక ప్రజలు, అధికారులు హర్షం వ్యక్తం చేశారు.
