వరంగల్ : వరంగల్–ఖమ్మం–నల్గొండ పట్టభద్రుల నియోజకవర్గ ఎమ్మెల్సీ ఎన్నికల నేపథ్యంలో కాంగ్రెస్ పార్టీ సమరశంఖం పూరించింది. ఎన్నికల సన్నాహకాల్లో భాగంగా వరంగల్‌లోని మడికొండ వద్ద గల శ్రీ సత్యసాయి కన్వెన్షన్ హాల్‌లో విస్తృత స్థాయి సన్నాహక సమావేశాన్ని నిర్వహించారు. ఈ సమావేశంలో ప్రభుత్వ విప్, డోర్నకల్ శాసనసభ్యులు డాక్టర్ జాటోత్ రామచంద్రనాయక్ ముఖ్య నాయకులతో కలిసి పాల్గొన్నారు.
ఈ సందర్భంగా పట్టభద్రుల ఓటర్ల నమోదు, క్షేత్రస్థాయిలో పార్టీ యంత్రాంగాన్ని సమాయత్తం చేయడం, కాంగ్రెస్ పార్టీ ఎమ్మెల్సీ అభ్యర్థి విజయానికి అనుసరించాల్సిన వ్యూహాలపై నాయకులు సుదీర్ఘంగా చర్చించారు. పట్టభద్రులు, యువత ఎదుర్కొంటున్న సమస్యల పరిష్కారానికి ప్రజా ప్రభుత్వం కట్టుబడి ఉందని, ప్రతి ఒక్క కార్యకర్త సైనికుడిలా పనిచేసి పార్టీ అభ్యర్థి రాంరెడ్డి సరోత్తం రెడ్డిని భారీ మెజార్టీతో గెలిపించాలని పిలుపునిచ్చారు.
ఈ కీలక సన్నాహక సమావేశంలో రాష్ట్ర మంత్రులు పొంగులేటి శ్రీనివాసరెడ్డి, సీతక్క, ఎంపీ వేం నరేందర్ రెడ్డి, కాంగ్రెస్ పార్టీ ఎమ్మెల్సీ అభ్యర్థి రాంరెడ్డి సరోత్తం రెడ్డి, ఎమ్మెల్యే కేఆర్ నాగరాజులతో పాటు ఉమ్మడి వరంగల్, ఖమ్మం, నల్గొండ జిల్లాలకు చెందిన పలువురు ప్రజాప్రతినిధులు, పార్టీ ముఖ్య నాయకులు, కార్యకర్తలు పెద్ద ఎత్తున పాల్గొన్నారు.
