రంగారెడ్డి బ్యూరో, సెప్టెంబర్ 24 (ప్రజానేస్తం న్యూస్): రంగారెడ్డి జిల్లాలో ఎస్సీ, ఎస్టీ వర్గాలకు సంబంధించిన సమస్యలను నిబంధనల మేరకు సత్వరమే పరిష్కరించేలా సంబంధిత అధికారులు ప్రత్యేక చర్యలు చేపట్టాలని తెలంగాణ రాష్ట్ర ఎస్సీ, ఎస్టీ కమిషన్ చైర్మన్ బక్కి వెంకటయ్య పిలుపునిచ్చారు.
గురువారం జిల్లా సమీకృత కార్యాలయాల సముదాయం (కలెక్టరేట్) సమావేశ మందిరంలో అదనపు కలెక్టర్లు కె. కిరణ్మయి, బి. చంద్రా రెడ్డి, డీసీపీ కె. నారాయణ రెడ్డిలతో కలిసి ఆయన రెవెన్యూ, పోలీస్, సంక్షేమ శాఖల అధికారులతో సమగ్ర సమీక్షా సమావేశం నిర్వహించారు. అంతకుముందు కలెక్టరేట్‌కు చేరుకున్న కమిషన్ చైర్మన్‌కు అధికారులు ఘన స్వాగతం పలికి, పోలీసుల గౌరవ వందనం స్వీకరించారు.
ఈ సందర్భంగా కమిషన్ చైర్మన్ బక్కి వెంకటయ్య మాట్లాడుతూ పలు కీలక ఆదేశాలు జారీ చేశారు:
అట్రాసిటీ కేసుల సత్వర పరిష్కారం:
జిల్లాలో నమోదైన ఎస్సీ, ఎస్టీ అట్రాసిటీ కేసుల దర్యాప్తులో అనవసర జాప్యం జరగకుండా చూడాలని ఆదేశించారు. బాధితులకు తక్షణ న్యాయం, ప్రభుత్వం నుంచి అందాల్సిన నష్టపరిహారం సకాలంలో అందేలా రెవెన్యూ, పోలీస్, సంక్షేమ శాఖలు సమన్వయంతో పనిచేయాలని సూచించారు.
భూ సమస్యలు, సంక్షేమ పథకాలపై ప్రత్యేక దృష్టి:
ఎస్సీ, ఎస్టీలకు చెందిన భూ వివాదాలను వెంటనే పరిష్కరించాలని, ప్రభుత్వ సంక్షేమ పథకాలు, విద్య, ఉపాధి, మౌలిక వసతుల కల్పనపై అధికారులు ప్రత్యేక దృష్టి సారించాలన్నారు. ప్రజావాణి ద్వారా వచ్చే ఫిర్యాదులను క్షేత్రస్థాయిలో పరిశీలించి పరిష్కరించాలని స్పష్టం చేశారు.
కాలనీల్లో మౌలిక వసతుల పర్యవేక్షణ:
ఎస్సీ, ఎస్టీ కాలనీలు, గిరిజన తండాల్లో తాగునీరు, విద్యుత్, పారిశుద్ధ్యం, రహదారులు తదితర మౌలిక వసతులను ఎప్పటికప్పుడు అధికారులు క్షేత్రస్థాయిలో పర్యవేక్షించాలన్నారు. ప్రభుత్వం అమలు చేస్తున్న సంక్షేమ పథకాలపై ప్రజల్లో విస్తృత అవగాహన కల్పించాలని సూచించారు.
అదనపు కలెక్టర్ చంద్రా రెడ్డి మాట్లాడుతూ:
జిల్లాలో అట్రాసిటీ బాధితులకు అందాల్సిన నష్టపరిహారం, విదేశీ విద్యా నిధి (ఓవర్సీస్ స్కాలర్‌షిప్స్), కులాంతర వివాహ ప్రోత్సాహకాల నివేదికలను త్వరితగతిన సమర్పించాలని అధికారులను ఆదేశించారు. నివేదికల ఆధారంగా బాధితులకు తక్షణమే పరిహారం అందిస్తున్నామని తెలిపారు.
ఈ సమీక్షా సమావేశంలో ఎస్సీ, ఎస్టీ కమిషన్ సభ్యులు రాంబాబు నాయక్, జిల్లా శంకర్, డీఎంసీ సభ్యులు విజయ్ కుమార్, బి. రాజు, లక్పతి నాయక్, యాదగిరి, పి. నర్సింహులు, జిల్లా సాంఘిక సంక్షేమ అధికారి రామారావు, ఎస్సీ డెవలప్‌మెంట్ అధికారి పద్మావతి, ఆర్డీవోలు, తహసీల్దార్లు, మున్సిపల్ కమిషనర్లు, ఎంపీడీవోలు మరియు ఇతర శాఖల అధికారులు పాల్గొన్నారు.
