టేక్మాల్ : పవిత్ర దేవి శరన్నవరాత్రి ఉత్సవాల సందర్భంగా మెదక్ జిల్లా, టేక్మాల్ మండలంలోని పల్వంచ గ్రామంలో ఆధ్యాత్మిక చైతన్యం వెల్లివిరుస్తోంది. కోరికలు తీర్చే కల్పవల్లిగా కొలువుదీరిన దుర్గామాతను దర్శించుకునేందుకు భక్తులు పెద్ద సంఖ్యలో తరలివస్తున్నారు. అమ్మవారికి ఉదయం నుంచే విశేష పూజలు, కుంకుమార్చనలు, దీపారాధనలు శాస్త్రోక్తంగా నిర్వహిస్తుండటంతో గ్రామంలో పండుగ వాతావరణం నెలకొంది.
స్త్రీశక్తి మహిమకు ప్రతీక నవరాత్రులు
ఈ సందర్భంగా భక్తులు మాట్లాడుతూ.. నవరాత్రులు కేవలం పూజలకే పరిమితం కాకుండా లోకకల్యాణార్థం చెడుపై మంచి సాధించిన విజయానికి, జగన్మాత స్త్రీశక్తి మహిమకు ప్రతీకగా నిలుస్తాయని పేర్కొన్నారు. ప్రతి రోజూ ప్రత్యేక అలంకారాల్లో కొలువుదీరుతున్న అమ్మవారి దర్శనం తమకు ఎనలేని ఆధ్యాత్మిక ఆనందాన్ని, మానసిక ప్రశాంతతను అందిస్తోందని భక్తులు హర్షం వ్యక్తం చేశారు.
గ్రామం సుభిక్షంగా ఉండాలని ప్రార్థనలు
జగన్మాత దివ్య ఆశీస్సులతో గ్రామ ప్రజలందరికీ శాంతి, సౌభాగ్యం, సిరిసంపదలు కలగాలని భక్తులు వేడుకున్నారు. గ్రామంలో సకల జనుల మధ్య ఐకమత్యం వెల్లివిరియాలని, పాడిపంటలు సమృద్ధిగా పండి ప్రతి కుటుంబం సుఖసంతోషాలతో, ఆయురారోగ్యాలతో వర్ధిల్లాలని ప్రత్యేక పూజలు జరిపి మొక్కులు తీర్చుకున్నారు. ఈ ఉత్సవాల్లో గ్రామ ప్రముఖులు, మహిళలు, యువకులు, భక్తులు విశేష సంఖ్యలో పాల్గొని అమ్మవారి తీర్థప్రసాదాలు స్వీకరించారు.
