ఓటర్ల జాబితా ప్రత్యేక సమగ్ర సవరణ (SIR) సర్వేలో భాగంగా టేక్మాల్ గ్రామంలో అధికారులు చేపట్టిన విచారణ ముమ్మరంగా సాగుతోంది. ఇందులో భాగంగా నోటీసులు అందుకున్న వారిలో ఇంకా 52 మంది సంబంధిత వివరాలతో సమాధానం ఇవ్వలేదని అధికారులు తెలిపారు. సకాలంలో సమాచారం అందించని పక్షంలో తమ ఓటు హక్కుకు సంబంధించి తలెత్తే పరిణామాలకు వారే పూర్తి బాధ్యత వహించాల్సి ఉంటుందని స్పష్టం చేశారు.
ప్రస్తుతం గ్రామంలోని అంగన్‌వాడీ టీచర్లు తమ పరిధిలోని పోలింగ్ స్టేషన్లలో (PS) మిగిలిన నోటీసులను పంపిణీ చేయడంతో పాటు, ఇప్పటికే నోటీసులు తీసుకున్న వారి వివరాలను సేకరించేందుకు ఇంటింటికీ తిరుగుతున్నారు. ఓటు హక్కు కలిగిన ప్రతి పౌరుడు బాధ్యతాయుతంగా స్పందించి, సర్వే నిర్వహిస్తున్న అంగన్‌వాడీ సిబ్బందికి సరైన సమాచారం అందించి సహకరించాలని అధికారులు విజ్ఞప్తి చేశారు.
