మెదక్, అక్టోబర్ 4: ఉద్యోగ విరమణ బాధ్యతలకు మాత్రమేనని.. ప్రజా సేవకు కాదని మాజీ డిప్యూటీ స్పీకర్ ఎం. పద్మా దేవేందర్‌రెడ్డి అన్నారు. డిప్యూటీ కమర్షియల్‌ ట్యాక్స్‌ ఆఫీసర్‌గా సుదీర్ఘకాలం సేవలందించి పదవీ విరమణ చేస్తున్న జెల్ల సుధాకర్‌ను అభినందించారు. ఉద్యోగుల హక్కులు, ప్రజా సమస్యల పరిష్కారంతో పాటు తెలంగాణ ఉద్యమంలో ఆయన చురుకైన పాత్ర పోషించారని కొనియాడారు. మెదక్‌లోని మంజీరా గార్డెన్‌లో జరిగిన అభినందన సభలో పద్మా దేవేందర్‌రెడ్డి మాట్లాడుతూ.. సకల జనుల సమ్మె, సహాయ నిరాకరణ వంటి ఉద్యమాల్లో సుధాకర్‌ పాల్గొని ప్రజలను చైతన్యపరిచారని గుర్తుచేశారు. పదవీ విరమణ అనంతరం తన అనుభవాన్ని సమాజ సేవకు వినియోగించాలని సూచించారు.
ఎస్సీ, ఎస్టీ కమిషన్‌ చైర్మన్ బక్కి వెంకటయ్య మాట్లాడుతూ.. ఉద్యోగ విరమణ ఉద్యోగ బాధ్యతలకు ముగింపు మాత్రమేనని, సమాజం పట్ల బాధ్యతలకు కాదన్నారు. కార్యక్రమంలో తెలంగాణ రాష్ట్ర బేవరేజెస్‌ కార్పొరేషన్‌ మాజీ చైర్మన్ దేవీప్రసాద్‌, టీఎన్జీవో జిల్లా అధ్యక్షుడు నరేందర్‌, ప్రధాన కార్యదర్శి రాజేందర్‌, మాజీ మార్కెట్‌ కమిటీ చైర్మన్ బట్టి జగపతి, కౌన్సిలర్లు మామిళ్ల ఆంజనేయులు, దీపక్‌కుమార్‌, సోహెల్‌, మాజీ కౌన్సిలర్లు ఆర్కే శ్రీనివాస్‌, మాయ మల్లేశం, నాయకులు జీవన్‌రావు, కృష్ణగౌడ్‌, లింగారెడ్డి, సాదిక్‌, షాకీర్‌, కిరణ్‌, ఎంబీపూర్‌ మహేష్‌ తదితరులు పాల్గొన్నారు.
