తెలంగాణలో ప్రసిద్ధిగాంచిన శైవ పుణ్యక్షేత్రం కొమురవెల్లి శ్రీ మల్లికార్జున స్వామి వారి దేవస్థానంలో నిర్వహిస్తున్న శ్రీ దేవి త్రిరాత్రి మహోత్సవాలు అత్యంత వైభవోపేతంగా, భక్తిశ్రద్ధల నడుమ కొనసాగుతున్నాయి. ఉత్సవాల్లో భాగంగా బుధవారం ఉదయం ఆలయ ప్రాంగణంలో అర్చక బృందం శాస్త్రోక్తంగా ప్రత్యేక పూజా కార్యక్రమాలను నిర్వహించింది.
ఉత్సవ దినచర్యలో భాగంగా తొలుత మల్లన్న గర్భాలయంలో శ్రీ మల్లికార్జున స్వామి వారికి విశేష రీతిలో రుద్రాభిషేకం జరిపించారు. అనంతరం క్షేత్ర రక్షకుడైన క్షేత్రపాల భైరవునికి శాస్త్రోక్తంగా భైరవార్చన పూజలు పూర్తి చేశారు. ఈ విశేష పూజల్లో అర్చకులు, వేద పండితులు పాల్గొని లోకకల్యాణార్థం మంత్రోచ్ఛారణలు గావించారు.
పుష్కరిణి వద్ద పంచామృతాభిషేకం – త్రిశూల స్నానం
రుద్రాభిషేకం, భైరవార్చన అనంతరం ప్రధాన అర్చకులు శ్రీ అమ్మవారి ఉత్సవమూర్తిని మంగళవాయిద్యాల నడుమ సంప్రదాయబద్ధంగా ఊరేగింపుగా ఆలయ పుష్కరిణి (కోనేరు) వద్దకు తోడ్కొని వెళ్లారు. అక్కడ అమ్మవారికి పంచామృతాలు, సుగంధ ద్రవ్యాలతో విశేష అభిషేకం నిర్వహించారు. అనంతరం వేదమంత్రాల మధ్య ప్రధాన కలశాభిషేకం, అర్చన, నీరాజన మంత్రపుష్పాదులు సమర్పించారు.
అనంతరం అత్యంత పవిత్రమైన అస్త్ర రాజార్చన నిర్వహించి, శ్రీదేవి మూర్తి సహితంగా అర్చకులు కోనేటి పవిత్ర జలాల్లో త్రిశూల స్నానం శాస్త్రోక్తంగా ఆచరించారు. ఈ పవిత్ర ఘట్టాన్ని తిలకించేందుకు భక్తులు పెద్ద సంఖ్యలో తరలివచ్చారు.
త్రిశూల స్నాన మహోత్సవం ముగిసిన తర్వాత, వెండి కుంభంలో సేకరించిన పవిత్ర పుష్కరిణీ జలాలను అర్చకులు ఆలయానికి తీసుకువచ్చారు. ఆ జలాలతో స్వామివారి గర్భాలయంలో మరోమారు రుద్రాభిషేకం, అష్టోత్తర శతనామార్చనలు భక్తిపూర్వకంగా జరిపించారు. చివరగా స్వామి, అమ్మవార్లకు మహామంగళహారతి, దివ్య మంత్రపుష్ప సమర్పణతో ఉదయం పూజా క్రమం పరిసమాప్తమైంది. ఆలయ అధికారులు భక్తులకు ఎలాంటి అసౌకర్యం కలగకుండా దర్శన ఏర్పాట్లను పర్యవేక్షించారు
