హైదరాబాద్: జవహర్‌లాల్ నెహ్రూ సాంకేతిక విశ్వవిద్యాలయం (జేఎన్‌టీయూ) పరిధిలోని విద్యార్థులకు యూనివర్సిటీ పరీక్షల విభాగం ఊరటనిచ్చే నిర్ణయం తీసుకుంది. జేఎన్‌టీయూ అనుబంధ, ప్రైవేటు అఫిలియేటెడ్‌ కళాశాలల్లో ఇంజనీరింగ్‌, ఫార్మసీ, మేనేజ్‌మెంట్‌ కోర్సులు పూర్తిచేసిన విద్యార్థుల కోసం ఈ ఏడాది కొత్తగా ‘డిజిలాకర్‌’ (DigiLocker) సదుపాయాన్ని అందుబాటులోకి తీసుకొచ్చింది.
కేంద్ర ప్రభుత్వం ప్రవేశపెట్టిన డిజిలాకర్‌ వ్యవస్థతో జేఎన్‌టీయూ అనుసంధానమైంది. దీనివల్ల విద్యార్థులు తమ ఒరిజినల్ ధ్రువపత్రాలను ఎక్కడి నుంచైనా సులభంగా, సురక్షితంగా డిజిటల్‌ రూపంలో పొందే వీలు కలుగుతుంది.
3.54 లక్షల మంది పట్టాలు అప్‌లోడ్
గత నాలుగు స్నాతకోత్సవాల్లో వివిధ అండర్‌ గ్రాడ్యుయేట్‌ (UG), పోస్ట్‌ గ్రాడ్యుయేట్‌ (PG) కోర్సులు పూర్తిచేసి పట్టాలు పొందిన మొత్తం 3,54,083 మంది అభ్యర్థుల ఒరిజినల్ డిగ్రీ సర్టిఫికెట్లను యూనివర్సిటీ ఇప్పటికే డిజిలాకర్‌లో నిక్షిప్తం చేసింది.
కోర్సుల వారీగా వివరాలు:
- బీటెక్‌: 2,84,303
- ఎంబీఏ: 22,624
- బీఫార్మసీ: 22,250
- ఎంటెక్‌: 8,533
వీటితో పాటు డిస్టెన్స్‌ ఎడ్యుకేషన్‌, ఎంఫార్మసీ, ఫార్మా-డి కోర్సులు పూర్తిచేసిన విద్యార్థుల డిగ్రీ పత్రాలను సైతం డిజిలాకర్‌లో అందుబాటులో ఉంచారు. ఉన్నత చదువులు, ఉద్యోగ ఇంటర్వ్యూలు మరియు వీసా పరిశీలన సమయాల్లో సర్టిఫికెట్ల ధ్రువీకరణకు ఈ సదుపాయం ఎంతో ప్రయోజనకరంగా మారనుంది.
